Venterom

Tenåringen med beige Uggs
og rosa tyggegummibobler.
Freistar gni vekk
dei tallause arra
på den kvite
underarmen.
Auge som ein
skremd hareunge.
Ho skal heim til
mardraumen sin.

Førtiåringen med grå dress
og eim av whisky og tobakk.
Freistar gni vekk
dei raude merka
på den kvite
skjortekragen.
Auge som eit
rovdyr.
Han skal heim til
illusjonen sin.

Åttiåringen med blomstret skaut
og lukt av brun alderdom.
Freistar gni vekk
dei uendelege linene
i det kvite andletet.
Auge som ei
døyande perleugle.
Ho skal heim til
einsemda si.

Eg med blå dongerbukse
og den grøne diktboka.
Freistar gni vekk
dei grå dagane
frå dei kvite arka.
Auge som på ein
framand art.
Eg skal ikkje heim.

Stjernestøv

Eg er
stjernestøv
pulveriserte fragment
svevar i sfæra
tek avskil med jorda.

Eg er
stjernestøv
ei handfull ljospartiklar
sirklar natta inn
er syster åt månen.

Kongen

Kongen steig ned frå trona;
ynskjer meg berre det ljose.
Mørkre er bannlyst frå riket.
Eg baud han ei kvit rose.

Kongen befala bryskt;
tårer forbode, mi vilje.
Folket mitt skal danse.
Eg baud han ei kvit lilje.

Kongen vandra i byen;
om landet mitt skal eg verne.
Vil ikkje ha noko natt her.
Eg baud han ei kvit stjerne.

Kongen gjekk ut i verda;
eg vil styre og kue.
Skal tvinge vekk hat og sorg.
Eg baud han ei kvit due.

Forbi

Du forsvinn bortover vegen,
vert til ein liten prikk,
eit punktum.

 
Dagen er grå,
skodde siv gjennom porene mine.
Eg ryddar vekk koppen din.

 
Eg legg meg på di side av senga,
kviskrar så høgt eg kan;
kom attende til meg.

Permafrost

Du kjem med
ei ishakke.
Slår laus.
Freistar losne meg.

Forstår du ikkje
eg er
ihelfrosen.

Siste gong

Augene møtes.
Og vi vert stille.

I fantasien
strekk eg handa ut
legg den i di.
Så du kan kjenne
korleis du
kjennes
for meg.

Jenta i spegelen

Ho ser
på meg.
Når ho
ikkje ser
at eg ser
ser eg
ho forsvinn.

Botsøving

Stå i regnet
naken
la dråpane
vaske kroppen din
rein
late regnet piske
kvar centimeter
av huda
flerre deg opp.

Stå i regnet
lyfte
hovudet mot himmelen
opne munnen
drikke kvar dråpe
som det var
heilag nektar
late regnet
drukne deg
langsamt.

Isne

Fløyelsmjukt legg eg eit klede
over levningane dine.
Finn to smaragdar
og puttar dei
i augneholane.
Legg glødande kol
der hendene dine
skulle vore,
legg kinnet mitt inntil,
så du kan varme meg.
Stel eit ishjarte frå breen,
kvesser det med øksa,
knekk opp ribbeina dine
legg hjartet på plass.

Kler av meg,
slår armane kring deg.
To ishjarta mot kvarandre.
Kysser augene dine god natt.

Slepp

Slepp tanken.
Slepp illusjonen.
Slepp draumen.
Slepp taket.
Slepp laus.
Slepp fri.
Slepp deg.

Slepp meg.

Slepp.